Tehran Qərbin boğazını sıxır

ABŞ dövlət katibi Hillari Klinton belə bir bəyanatla çıxış edib. Klinton bildirib ki, Tehranın “altılıq” ölkələri ilə görüşdə irəli sürdüyü təkliflər “prosesi irəli aparmır”, lakin İran liderlərinin hələ vəziyyəti düzəltmək üçün vaxtları var.
Böyük Britaniyanın xarici kəşfiyyat orqanı olan Mİ-6-nın rəhbəri Con Savers ingilis agentlərin İranın nüvə silahına sahib olmasını 2008-ci ildən bəri əngəllədiklərini, lakin Tehranın gələcək iki il içərisində silahlanma məsələsində uğur qazanacağını bildirib.
APA-nın məlumatına görə, Mİ-6-nın rəhbəri deyib ki, İran 2014-cü ilədək nüvə silahına sahib olacaq və bu vəziyyətdə də ABŞ və İsrailin Tehrana hərbi müdaxilə ehtimalı artır: “İran nüvə dövlətinə çevrilərsə, İsrail və ABŞ-ın böyük təhlükə ilə qarşı-qarşıya qalacağı açıqdır. İsrailin hansısa baş nazirinin, ya da ABŞ prezidentinin nüvə dövlətinə çevrilmiş İranı qəbul etməsinin çətin olacağını düşünürəm”. C. Savers vurğulayıb ki, İran nüvə silahı istehsal etmək sahəsində xeyli təcrübə əldə edib və bütün texnologiyaya sahibdir.
“İran nüvə silahı istehsal etmək niyyətində olduğu və terrorla məşğul olduğu müddətdə Orta Şərqdə sabitlik olmayacaq”. APA-nın “Fars” xəbər agentliyinə istinadən məlumatına görə, bunu İsrailin baş nazirinin müavini Moşe Yaalon bildirib. İsraildə nəşr olunan “Jerusalem Post” qəzetinin yazdığı xəbərə görə, M. Yaloon deyib ki, İranın regional və beynəlxalq gücə çevrilməsinə əngəl törədilməlidir: “İrana qarşı dayanılmadığı müddətcə Əfqanıstan, İraq, Bəhreyn, Suriya və Livanda sabitlik təmin edilə bilməz. İranın təhdidinə son vermək Orta Şərq və dünya ölkələrinin sabitliyi üçün vacibdir. Mümkün olan bütün vasitələrlə İranın nüvə dövlətinə çevrilməsinə mane olmaq lazımdır”.
İran parlamentinin deputatı Cavad Kərimi Quddusi isə Hörmüz boğazının bağlanması ilə bağlı hazırlanmış qanun layihəsi üçün imza toplanıldığını bildirib. APA-nın “Fars” xəbər agentliyinə istinadən məlumatına görə, Xorasan viyalətinə bağlı Məşhəd şəhərindən seçilmiş millət vəkili deyib ki, qanun layihəsi üçün 250 imza lazımdır: “Artıq 150 millət vəkili qanun layihəsini imzalayıb. İmza sayı 250-yə çatdığında qanun layihəsi parlamentin Rəyasət Heyətinə təqdim ediləcək”.
Onun sözlərinə görə, Qərbin gələcəyi Hörmüz boğazından ixrac edilən neftə bağlıdır: “Bu gün boğazı bağlamaq planı İran Silahlı Qüvvələrinin masasının üzərində olan variantlardan biridir”. C. Quddusi qanun layihəsinin bəzi detallarını da açıqlayıb: “Qanun layihəsinə əsasən, Hörmüz boğazı İrana tətbiq olunmuş bütün sanksiyalar aradan qaldırılmayanadək bağlı qalacaq. Bu qanun layihəsi qəbul edilsə, İran sanksiyaların götürülməsindan sonra da irəli sürdüyü 14 şərt yerinə yetirilməyənə qədər boğazı açmayacaq. Bu 14 şərtdən biri neft idxal edən ölkələrin İrana neftin qiymətinin 3%-i qədər boğazdan istifadə haqqı verməsindən ibarətdir”.