İvrit dilində dərc olunan bir qəzet ötən həftənin çərşənbə günü axşam saatlarında İsrail ordusunun Qəzzə zolağının cənubunda yerləşən Xan Yunisdəki Avropa Xəstəxanasının altında HƏMAS-a aid tunelin olması ilə bağlı “aldadıcı” məlumat verdiyini və xəstəxananın 24 saat ərzində iki dəfə güclü bombardmana məruz qaldığını açıqlayıb.
İsrail qəzetinin bir hesabatında iddia edilir ki, İsrail rejiminin ordusu tərəfindən yayımlanan hava görüntülərinin təhlili “bu tunelin yaxınlıqdakı Cenin adlı məktəbdə yerləşdiyini göstərir.”
Qəzet əlavə edib: Bu tunel “ordunun iddiasının əksinə olaraq xəstəxananın içində deyil” və “tunelin tibbi mərkəzin altından keçdiyini təsdiqləyən heç bir sübut yoxdur.”
Səhiyyə və mülki müdafiə nazirliklərinin bəyanatlarına əsasən, İsrail ordusu ötən həftənin çərşənbə axşamı axşam saatlarında Qəzzədəki Avropa xəstəxanasına və onun ətraf bölgələrinə qarşı vəhşi hava hücumları həyata keçirib və bu hücumlar nəticəsində 34 fələstinli şəhid olub, bir çoxu isə yaralanıb.
İsrail rejimi ordusu ilə Şin Bet təhlükəsizlik xidmətinin birgə bəyanatında Qəzzədəki Avropa xəstəxanasının altında yerləşən bir komanda və idarəetmə kompleksində HƏMAS qüvvələrinə “dəqiq hücum” etdiklərini bildirib.
Bəzi ivritdilli media orqanları bu hücumun məqsədinin HƏMAS-ın hərbi qanadı olan Qassam briqadalarının tanınmış liderlərindən biri, Məhəmməd Sinvarı öldürmək olduğunu xəbər verib.
Məhəmməd, 16 Oktyabr 2024-cü ildə İsrail rejimi tərəfindən sui-qəsd nəticəsində şəhid edilən HƏMAS-ın siyasi bürosunun rəhbəri Yəhya Sinvarın qardaşıdır.
Digər tərəfdən, HƏMAS bu rejimin Qəzzə Avropa xəstəxanasına hücumunu “yeni bir müharibə cinayəti” olaraq qiymətləndirib.
Hərəkat vurğulayıb ki, Təl-Əvivin xəstəxananın ətrafında hərbi baza olduğuna dair iddiaları yalandır və dünya ictimaiyyətini çaşdırmaq üçün atılan bir addımdır; bu iddialar işğalçılar tərəfindən Qəzza zolağında tibb müəssisələrinə hücum etmək, günahsız mülki şəxsləri öldürmək və qorxu yaratmaq üçün təkrar-təkrar istifadə olunub.
Mayın 8-də Qəzzədəki hökumət media ofisindən verilən açıqlamaya görə, “İsrail” hücumu zamanı 38 xəstəxana, 81 sağlamlıq mərkəzi və 164 müalicə mərkəzi dağıdılıb, yandırılıb və ya xidmətdən çıxarılıb.
Sionist rejim 2023-cü il Oktyabrın 7-dən Qəzzədə fələstinlilərə qarşı genişmiqyaslı soyqırımını, o cümlədən qətl, dağıntılar, aclıq və məcburi köçkünlükləri davam etdirir və Beynəlxalq Ədalət Məhkəməsinin bütün tələb və əmrlərinə məhəl qoymur.
