2005-ci ilin Noyabr ayının 19-da Hədisə şəhərində qadın, kişi və uşaqlardan ibarət 24 nəfər iraqlı mülki şəxsin bir qrup amerikalı dəniz piyadaları tərəfindən öldürülməsi ilə nəticələnən “Hədisə qətliamı” hadisəsindən sonra, ABŞ-ın bu xüsusi təyinatlıları çoxlu şəkillər çəkməklə cinayətlərinin nəticələrini qeydə alıblar. Amma ABŞ ordusu uzun illərdir ki, bu fotoları ictimaiyyətdən uzaq tutmağa çalışıb.
2005-ci ilin Noyabr ayının 19-u səhər 4 hərbi maşın ilə dəniz piyalarının bir heyəti İraqın Hədisə şəhərində yolda hərəkət edərkən, yol kənarındakı bombaya dəyir. Bu partlayış nəticəsində bir dəniz piyadası ölüb, 2 nəfər isə yaralanır. Bundan sonra baş verənlər ABŞ tarixində ən böyük hərbi cinayətlərdən birinin araşdırılmasına səbəb olur.
Bir neçə saatdan sonra qeyd edilən ABŞ hərbiçiləri 24 nəfər iraqlı kişi, qadın və uşağı qətlə yetirirlər. Onlar partlayış yerinin yaxınlığında Bağdaddakı bir universitetə tərəf hərəkət edən 5 kişiyə atəş açaraq, onların həyatına son qoyurlar. Bu üsyançı hərbiçilər, həmçinin yaxınlıqda olan 3 evə daxil olub, demək olar ki, oradakı bütün insanları öldürürlər.
Ən kiçik qurban 3 yaşlı qız uşağı, ən yaşlı qurban isə 76 yaşlı bir kişi olub.
ABŞ Dəniz Qüvvələrinin piyadaları sonradan həmin gün silahlılarla mübarizə apardıqlarını iddia etdilər, amma öldürülənlərin hamısı mülki şəxslər idi.
İraqlı mülki şəxslərə qarşı qanlı qətliam bitdikdən sonra digər iki dəniz piyadası qətl səhnələrini sənədləşdirmək üçün işə başlayıb. “Ryan Briones” özü ilə rəqəmsal kamera, “Endryu Rayt” qırmızı marker gətirib.
Briones və Rayt bir yerdən başqa yerə gedirlər; cəsədlərin üzərinə rəqəm yazıb sonra şəkil çəkirlər. Digər hərbiçilər də amerikalıların iraqdakı bu cinayət səhnələrinin şəkillərini çəkirlər. Həyatını itirənlərin şəkillərinin çəkilişi bitməklə, onlar öz silahdaşlarına qarşı ən böyük sübut olan fotolar toplusu yaradırlar.
Bu qətliam “Hədisə qətliamı” kimi tanınır.
4 dəniz piyadası qətldə ittiham olundu. Amma sonra bu ittiham rədd edildi. Sonradan ABŞ Müdafiə naziri olan General Ceyms Mettis dəniz piyadalarından birinə göndərdiyi məktubda ona olunan ittihamları rədd etdi və onun günahsız olduğunu bildirdi. 2012-ci ildə yekun iş həbs hökmü olmadan bir razılaşma ilə sona çatdığı zaman İraq mühasirəsi sona çatdı və ABŞ işğalçılığı ilə bağlı hekayələr çox az hallarda diqqətə alındı.
Hədisə qətliamı vaxtı ABŞ Dəniz Qüvvələrinin Piyada Korpusunun generalı olan “Maykl Hagi” 2014-cü ildə Hədisə qətliamı ilə bağlı fotoları gizli saxlanılması barəsində özü ilə fəxr edərək deyib: “Mətbuat Əbu Ğəribin əksinə olaraq, heç vaxt bu fotoları əldə etmədi. Əbu Ğəribdəki görüntülər pis idi və mən bundan dərs aldım. Buna görə də, Hədisə şəkilləri hələ də görünməyib. Mən bununla fəxr edirəm.”
Bir qrupun ABŞ orudusundan şəkilləri almaq üçün səy göstərdiyi halda, New Yorker veb-saytının 2 üzvü öldürülənlərin ailə üzvləri ilə görüşmək üçün İraq gediblər, amma bu iş nəticəsiz qalıb.
Daha sonra amerikalı bir jurnalist və ailə üzvləri öldürülən iraqlı iki kişi Amerika ordusunun sirlərini üzə çıxarmaq üçün əməkdaşlıq ediblər. İndi New Yorker ABŞ ordusunun cəzasız qalan dəhşətli qətlini göstərmək üçün sağ qalan ailə üzvlərinin icazəsi ilə seçmə şəkilləri təsvir edib.
“Zeynəb Yunis Səlim” adlı 5 yaşlı qız amerikalı bir dəniz piyadası tərəfindən baş nahiyəsindən güllə yarası alıb. Zeynəb anası, bacıları və qardaşı ilə birlikdə yataqda dünyasını dəyişib. Dəniz piyadalarından biri sonradan onun belinə qırmızı markerlə 11 rəqəmi yazıb.
40 yaşlı “Ayda Yasin Əhməd” adlı bir ana yataq otağında ölmüş övladları ilə əhatə olunub. Yataqda olan hər bir kəs amerikalı dəniz piyadaları tərəfindən güllələnərək öldürülüblər. Soldan sağa 10 yaşlı “Səba”, 3 yaşlı “Aişə”, (şəkildə öndə olan) 5 yaşlı “Zeynəb”, 8 yaşlı “Məhəmməd” və “Ayda”. Yalnız atəş açılan zaman çarpayının bir kənarında gizlənən “Səfa” adlı 11 yaşlı qız sağ qalıb.
Dəniz Qüvvlərinin Axtarış Xidmətinin qeydlərinə görə, “Stiven Tatum” adlı dəniz piyadalarından biri müstəntiqlərə bildirmişdi ki, atəş açmazdan öncə otaqdakıların qadın və uşaq olduqlarını bilib. Tatum çarpayı üzərində qısa saçlı bir uşaq gördüyünü bildirərək deyib: “Onun uşaq olduğunu bildiyim halda ona atəş açdım.” O, sonradan bu açıqlamalarını inkar edib.
Səfa New Yorker-ə deyib ki, o və bacısı Nur çarpayının arxasında gizlənmişdilər. Amma dəniz piyadalarından biri tüfəngini çarpayının altına tutaraq onlara tərəf atəş açıb. Bu hərbiçi Səfanı vura bilməsədə, Nuru qətlə yetirib.
Bu, Aydanın, onun bacısının və övladlarının öldürüldüyü yataq otağıdır. Bu şəkil cəsədlərin və döşəyin götürülməsindən sonra çəkilib.
Səfa ailəsinin evinin dəhlizi. Yerdə qan izləri görünür. Çox güman ki, öldürüldükdən bir neçə saat sonra ailə üzvlərinin cəsədlərinin hərbiçilər tərəfindən çölə çıxarılması zamanı ortaya çıxıb.
66 yaşlı “Xəmisə Tuma Əli” evin ilk dəhlizində qətlə yetirilib. “Hector Salinas” hərbi müstəntiqlərlə müsahibəsində atəş açaraq onu öldürdüyünü etiraf edib. Hərçənd ki, o, həmin şəxsin qadın olduğunu bilmədiyini iddia edib. O, deyib: “Dəhlizdə qaçan şəxsdə gördüyüm yeganə şey onun böyrü və kürəyinin bir hissəsi idi. Mən onun yaşını, cinsini yaxud silahlı olub-olmamasını müəyyən edə bilmədim.”
Amerika hərbiçiləri atəş açmazdan öncə həmin şəxslərin düşmən hədəfləri olduğunu müəyyən etməli idilər. Salinas deyib ki, o, atəş açıb. Çünki atəşin həmin istiqamətdən açıldığını güman edib. Həmin evdə heç bir silah aşkarlanmadı. Hərbi araşdırmalar müəyyən etdi ki, öldürülənlərin hamısı mülki şəxslər olub.
Həmin gün ABŞ hərbiçiləri tərəfindən öldürülən 5 nəfər. Bu 5 nəfər dəniz piyadaları karvanının hərəkət etdiyi həmin yolda ağ rəngli maşınla Bağdaddakı bir universitetə tərəf gedirdilər. Karvan yolun kənarındakı bombaya dəyməzdən öncə hərbiçilər maşını saxlayıblar. Partlayışdan sonra 5 nəfərin hər biri güllələnərək öldürülüb.
Maşının sürücüsü 29 yaşlı “Əhməd Fənnar Muslih”, sərnişinlər isə 19 yaşlı “Vəcdi Əyad Əbdül-Hüseyn”, 19 yaşlı “Əkrəm Həmid Fələh”, 26 yaşlı “Xalid Əyad Əbdül-Hüseyn” və 21 yaşlı “Məhəmməd Bətal Əhməd” olub.
Dəniz piyadaları cəsədləri və maşını yoxlayıblar və heç bir silah tapmayıblar.
