BMT-nin Suriyadakı elçisi Dəməşqə hakim olan silahlı üsyançıların Suriya ələvilərinə qarşı törətdiyi cinayətləri etiraf edərək, bu cinayətlərin məsul şəxslərinin cəzalandırılmalı olduğunu bildirib.
Xarici KİV-in verdiyi məlumata görə, bu gün (cümə günü) BMT-nin Suriyadakı xüsusi nümayəndəsi Geyr Pedersen Dəməşqdəki silahlı üsyançıların cinayətlərini tənqid edərək etiraf edib ki, Suriyanın bir hissəsində, xüsusilə sahil bölgəsində (ölkənin qərbində) əhali hələ də zorakılıqla qarşı-qarşıyadır. Xəbər agentliklərindən biri Pedersenə istinadən bildirib ki, Suriyada qanunun aliliyinə və ədalətin tətbiqinə doğru hərəkət mövcud problemləri azaldacaq və zorakılığın təzahürlərini aradan qaldıracaq.
Eyni zamanda, o, suriyalı üsyançıların lideri və keçid dövrünün rəhbəri kimi çıxış edən “Əbu Məhəmməd əl-Colani”yə çağırış edərək, Suriyanın qərbindəki qətliamlarla bağlı aparılan istintaqın nəticələrini ictimaiyyətə açıqlamağa və cinayətkarların cəzalandırılmasını təmin etməyə çağırıb.
Silahlı üsyançılar yaxın vaxtlarda əsasən ələvilərin yaşadığı Suriyanın qərbində kütləvi qətliamlar həyata keçirdilər ki, bu hadisələr nəticəsində yüzlərlə mülki şəxs həyatını itirdi.
Suriyada İnsan Hüquqları Müşahidə Təşkilatı son açıqlamasında bildirib ki, Laziqiyyə, Tartus və Banyas vilayətlərində mülki şəxslərə qarşı baş verən qanlı hadisələrdə 1676 nəfər həyatını itirib.
Amnesty International (Beynəlxalq Amnistiya Təşkilatı) daha əvvəl verdiyi yeni hesabatda qeyd edib ki, Suriya yeni hökumətinə bağlı yarımhərbi qruplar qisas məqsədilə ələvi məzhəbinə mənsub mülki vətəndaşları qəsdən qətlə yetiriblər.
Amnesty International öz hesabatında bu kütləvi qırğınların “hərbi cinayətlər” kimi araşdırılmasını tələb edib və Suriyaya hakim olan üsyançı hökuməti sahil bölgələrindəki qanlı qarşıdurmalara görə məsuliyyət daşıyan tərəf elan edib.
Amnesty International bildirib ki, Suriya hökumətinə bağlı üsyançılar Martın 8-i və 9-u tarixlərində sahil şəhəri Banyasda 100-dən çox nəfəri qətlə yetiriblər. Təşkilat bu qəbildən olan 32 hadisəni araşdırıb və bu nəticəyə gəlib ki, hücumlar qəsdən, qeyri-qanuni şəkildə həyata keçirilib və həmin bölgədəki ələvi azlıqlar hədəf alınıb.
Təşkilat şahidlərin ifadələrinə əsaslanaraq bildirib ki, Suriya üsyançı hökuməti bəzi qurban ailələrini öz yaxınlarını heç bir dəfn mərasimi olmadan kütləvi məzarlıqlarda basdırmağa məcbur edib. Peyk görüntüləri də bəzi bölgələrdə bu qətliamların qurbanlarının dəfn edilməsi üçün qazıntıların aparıldığını göstərir.
Pedersen həmçinin bildirib ki, Suriya bütün xalq təbəqələrinin təmsil olunduğu əhatəli siyasi həll yoluna ehtiyac duyur.
O, etiraf edib ki, Suriyada siyasi hakimiyyətin ötürülməsi bu günə qədər hətta əhatəli bir çərçivəyə belə malik deyil və üsyançıların diqqəti yalnız güc tətbiqinə yönəlib.
BMT nümayəndəsi Suriyada müxtəlif silahlı qrupların mövcudluğunu tənqid edərək bildirib ki, bütün bu qruplar bir ordu çərçivəsində birləşdirilməli və hökumət strukturlarından kənarda heç bir silah olmamalıdır.
