Sionist rejim Əl-Xəyyam həbsxanasında işgəncələr törətdiyini etiraf edib

Sionist rejimin daxili təhlükəsizlik xidməti (Şabak) Qərbi Qüds Ali Məhkəməsinin göstərişi ilə Əl-Xəyyam həbsxanasındakı livanlı və fələstinli kişi və qadınların çox çətin şəraitindən bəhs edən bəzi arxiv sənədlərini açıqlamağa məcbur olub.
“Middle East” qəzetinin məlumatına əsasən, Şabakın dərc etdiyi sənədlər sionist rejimin bu həbsxanada çox dəhşətli cinayətlər törətdiyini göstərir.
Belə ki, sionist rejim livanlı və fələstinli məhbuslara qarşı ən dəhşətli işgəncə üsullarından, o cümlədən, elektrik şokundan, aclıq, tibbi xidmətdən məhrumetmə, mühakiməsiz olaraq müddətsiz həbslərdən istifadə edib.
İnsan Hüquqlarını Müdafiə Mərkəzinin keçmiş baş direktoru Dalia Kerstein deyib:
İsrailin Livanın cənubunda tətbiq etdiyi qəddar üsullar, o cümlədən, Əl-Xəyyam həbsxanasındakı amansız işgəncələr İsrail tarixinin qara ləkələrindən biridir və İsrail orada bütün əməllərini ortaya qoymayana və keçmişi ilə üzləşməyənə qədər Livandan tamamilə ayrılması əsla gerçəkləşməyəcək.
Kerstein sözlərinə belə davam edib:
Əl-Xəyyam həbsxanası muzeyə çevrildikcə, İsrailin həbsxanadakı fəaliyyəti ilə bağlı sənədləri gizlətmək cəhdləri davam edir və bu vəhşilikləri törədən kəslər cinayətlərinə görə mühakimə olunmamış və hələ də aramızdadır.
İşğalçı sionist rejim 1985-ci ildə, yəni Cənubi Livanın işğalından üç il sonra, Livanın cənubundakı eyniadlı kəndin yaxınlığında və Livanın işğal olunmuş ərazilərlə sərhədindən bir neçə kilometr aralıda Əl-Xəyyam həbsxanasını inşa edib.
Bu həbsxanada Hizbullah, Kommunist Partiyası, Fəth Hərəkatı, Fələstinə Azadlıq Xalq Cəbhəsi, Fələstin Demokratik Cəbhəsi və işğalçı rejimin əleyhdarları kimi bir çox Livan və Fələstin partiya və hərəkatının üzvləri müvəqqəti və daimi olaraq həbs edilib.
O zamanlar sionist rejimin həbsxananı idarə etmədiyini və həbsxana ilə heç bir əlaqəsinin olmadığını iddia etməsinə, hətta Sionist ordunun o zamankı Baş Qərargah rəisi Den Hallotsun da məhkəmədə and içərək onun ordusunun həbsxananı idarə etmədiyini söyləməsinə baxmayaraq, ifşa olunmuş sənədlər Əl-Xəyyamın İsrail həbsxanası olduğunu göstərdi.
İsrail rejimi həbsxananın idarə olunmasında İsrail ordusu və Şabak tərəfindən təlim keçmiş bəzi silahlı qruplaşmalardan istifadə edib.
Sözügedən sənədlər bir qrup hüquq müdafiəçisinin müdafiə vəkili İtai Mak vasitəsilə sionist rejimin Ali Məhkəməsindən edilən tələbindən sonra sızdırılıb.
İbrani dilində çıxan Haaretz qəzeti çərşənbə günü Mak-dan sitat gətirərək yazıb:
İsrail ordusu və Şabak Cənubi Livan ordusu ilə birlikdə bu həbsxananı eynilə Latın Amerikasındakı hərbi diktatorların həbsxana və təcridxanaları idarə etdiyi kimi idarə edirdi.
Bu həbsxanada həyata keçirilən işgəncələr insanlığa qarşı cinayətlər səviyyəsində idi və sızdırılan sənədlər insanı şoka salır. Bu iş üzrə iddiaçılar məhkəmədən Şabaka bu həbsxanada baş verən ağır və qeyri-insani işgəncə və cəzaları göstərən sənədləri təqdim etməyi tapşırmağı xahiş ediblər.
Məhkəmə iddianın ilk iclasının apreldə keçirilməsinə qərar verməsinə baxmayaraq, Şabakın əlində olan yalnız bəzi sənədləri təqdim etməsinə icazə verib.
1988-ci ilə aid bu sənədlərdən birində məhbusların aclıqdan əziyyət çəkdiyi göstərilir.
Həmçinin, bu həbsxanaya aid başqa bir sənəd Əl-Xəyyam həbsxanasında məhbusların sıxlığından xəbər verir.
Digər bir sənəddə isə həbsxanada bir çox qadının dindirildiyi, onlardan Hizbullah ilə əlaqədə şübhəli bilinən birindən etiraf almaq üçün dindirmə zamanı elektrik cərəyanından istifadə edildiyi bildirilir.
1997-ci ilə aid sənəddə də bu həbsxanadakı məhbusların fiziki problemləri göstərilir.
Sənəddə həbsxana rəsmisinə istinadən bildirilir ki, əgər məhbus fiziki problemlərdən və dərman çatışmazlığından ölürsə, onun üçün heç bir konpensasiya yoxdur.
Sionist rejimin insan haqları assosiasiyasının hüquq müşaviri Dan Yaker bildirib ki, onun assosiasiyası və İnsan Haqlarını Müdafiə Mərkəzi 1999-cu ildə Ali Məhkəməyə müraciət edərək məhbusların azad edilməsi və onlarla görüşmək üçün icazə verməsini istəyiblər. Lakin Ali Məhkəmə vəsatəti nəzərdən keçirməkdən yayınıb.
Yaker vurğulayıb: “Şabak bu həbsxanada məhbusların qeyri-insani şəraitindən, yemək çatışmazlığından, dindirmə zamanı edilən işgəncələrdən xəbərdar idi.”
Eyni zamanda sənədlər İsrail ordusunun, xüsusən də Şabakın Livanın cənubunda yüzlərlə mülki şəxsin qanunsuz həbsində geniş şəkildə iştirak etdiyini göstərir.