İtaliyanın “Inside Over” internet saytının xəbərinə görə, Qəzzə və Livandakı müharibələrə qatıldıqdan sonra İsrail əsgərləri arasında intiharların artması rejim ordusundakı psixoloji böhranın dərinliyindən xəbər verir.
Hesabatın müəllifi Andrea Umbrello Qəzzə və Livanın döyüş bölgələrində xidmət keçdikdən və zorakılıq kabuslarını görərək Safed şəhəri yaxınlığında özünü yandıran əsgər Daniel Edrinin hadisəsindən danışıb.
Ailəsinin dediyinə görə, Qəzzə və Livanda qurbanların cəsədlərinin görüntüləri və yandırılmış ət qoxusu onun rahatlığını tamamilə məhv edib. Bu hərəkətdən bir neçə gün əvvəl Edri yuxusuzluq və müharibə ilə bağlı narahatedici xatirələrə görə təcili olaraq psixiatrik müalicəyə ehtiyacı olduğunu danışsa da, ona uzun müddət gözləməli olacağı bildirilib.
Məlumata görə, Qəzzə müharibəsi başlayandan bəri ən azı 43 İsrail əsgəri intihar edib və çoxlu sayda əsgər ağır psixi pozğunluqlarla mübarizə aparır.
Statistikalar göstərir ki, 1600-dən çox əsgər travma sonrası stress pozğunluğundan (TSSB) müalicə olunur və İsrail ordusu təcili yardım xətləri yaratmağa məcbur olub. Bununla belə, ekspertlər vurğulayıblar ki, mövcud psixi sağlamlıq sistemi böhranın miqyasına cavab vermir.
Hesabatda göstərilib ki, İsrail rejiminin Qəzzə və Livana hücumları təkcə bu bölgələrdə humanitar fəlakətlərə səbəb olmayıb, həm də İsrail əsgərlərinin psixi sağlamlığına o qədər dağıdıcı təsir göstərib ki, onların bir çoxu müharibədən qayıtdıqdan sonra dərin psixoloji problemlər və günahkarlıq hissi ilə üzləşib.
